I red wia ma da Schnowe gwoxn is

weas lest, is söwa schuid.

Übrigns is ois völlig frei erfunden und jede Ähnlichkeit mit lebenden oda todn Personen ist wirkle rein zufällig ;-)

© is meins

 

Unlängst woa  i aum Christkindlmoakt, bei da Eröffnung. Bin leida a bissl z´pät kuma, da Burgamasta woa scho fertig mit seina Aunsproch.

Da Punsch riacht guat und daneben steht glei der Maronivakäufer. Eapfepuffagruch vermischt se mit dem siassn Gruch von da Zuckawatte und den Knoblauch von de Langosch hob i jetzt a in da Nosn.

I glaub, jetzt genehmig i mia  an Punsch. Wos? Via Euro fuffzg? Nau seawas, des san Preise und 7 Stickln Maroni um zwa Euro? Sechs Euro fuffzg..schnö umrechna, jo maunchmoi moch i des imma no, oiso des san in Schülling ungefähr … a Wauhnsinn, neinzg Schülling?? Oiso wirkle, nie im Lem tät des sovü kostn waunn man no in Schülling hättn, a wauns teira woan wa mit de Joah, owa niamois so vü, oda? Owa aunscheinend haum de Leit imma no gnua Göd, de Punschstandln mochn s´Beste G´schäft. Ma kummt fost net zuwe sovü Leit stengan do. Na, i mog eh kann Punsch, kriag i eh nua Sodbrenna davo. Und de Preise san afoch zum ohgwena. Jednfois fia a Rentnerin. Mit da Mindestrentn kaunnst net weit springa, oiso begnüg i mi mitn Duft vom Glühwein und Punsch.

„Jo grüß sie Herr Bürgermeister“ duat steht er mit a poa wichtig dreinschauende Herren im schwoazn Wintamauntl. Beim großen Christbam stengans und schüttln sich de Händ. Ah den aundan kenn i  a, is irgend a hochs Viech in da Partei, da Naum foit ma jetzt net ei. Grod haums den Christkindlmoakt eröffnet und jetzt gengans sicha wos trinken, de feine Bagage. I tät jo glott frong obs ma an Punsch zoin, soi i ? Jo, den Spaß moch i ma.  Oiso :“ Grüß sie Herr Bürgermeister, Tag die  Herren, fein iser unser Christkindlmoakt, göns? Nur leider so teia ois, na für de Herrschoftn is des jo ka Problem, net woah? Verdienen tuns ja gnua und nebnbei geht jo ah so ollahaund wia ma heat. Jojo, unsaans muss mit a poa Netsch auskumma, und dazuavadiena deaf ma jo nix, des deafn nua de Herrn und Damen Politiker, göns? Nau, nix fia Unguat, tschuldigns de Störung Herrschoftn.“

Jetzt tua i so ois tät i mi umdrahn und weggeh…owa daunn bleib i steh und sog: “ Ah, apropos, nebnbei , oiso i tät mi bestechn lossn von der Herrschoftn (dabei loch i vaschmitzt) i vasprich ihna, waunns ma an Punsch zöin tätn, daunn geh i auf da Stö und belästig ihna nimma, Ehrnwurt.“ Daunn sog i no: „ Und i hoit meine Vasprechn, net so wia de Damen und Herrn Politiker vor de Woihn, dass ois vasprechn und daunn nix mehr wissen!“ Und wieder zwinka und grins i dabei.

Heans, wos soi i ihna song, se weans net glaum. Da Vötlina Michl is zum Punschstandl gaunga, hot an Zwanzga higlegt und gsogt: „Gebns der Dame Punsch“ und zu mir sogt a: „Prost, und trinkens halt langsam, Gnä´Frau, damits wieder gut heimkommen!“

„ Ah danke Herr Bürgermeista, ka Aungst, i vatrog scho wos, göns, se jo a“ sog i zu eahm mit an Zwinkan.

Gnä Frau sogta zu mia, nau des gfoit ma.

Mit den Zwanzga gengan se via Punsch aus, is ma zvü. Drum frog i den Punschvakeifa, waunn i nua zwa trink, ob a ma des Restgöd aussagibt. Drauf er: „Nix können, Burgamasta geben Zwanzga und sagen Punsch für Dame, ich nix zuruckgeben.“

Nau bevoa i dem Gfrast den Rest schenk, sauf i de via Punsch. Is ma wuascht ob i daunn Sodbrenna hob.